ಐಪಿಲ್ ಎಂಬುದು ಸ್ವಾರ್ಥಿಗಳ ಆಟ

“ದಿನಗಳೆದಂತೆ ದೇಶದುದ್ದಗಲಕ್ಕೂ, ಮನೆ-ಮನಗಳಲ್ಲಿ ಐಪಿಲ್ ಜ್ವರದ ಬಿಸಿಯೇರುತ್ತಿದೆ. ಕ್ರಿಕೆಟ್ಟಿನ ಅನಿಶ್ಚತೆ-ರೋಚಕತೆ ನಶೆಯೇರಿಸುತ್ತಿದೆ. ಈ ಎಲ್ಲ ಆವೇದನೆ-ಆಕರ್ಷಣೆಗಳಿಂದ ಹೊರಬಂದು, ಅರಿವಿನ ಕಂಗಳಿಂದ ಸೂಕ್ಷ್ಮವಾಗಿ ಅವಲೋಕಿಸಿದಾಗ ಎಷ್ಟೆಲ್ಲ ಮಾರ್ಮಿಕ ಸತ್ಯಗಳು ಗೋಚರಿಸುತ್ತವೆ. ಏನೇನೆಲ್ಲ ಕಟುವಾಸ್ತವಗಳು ಅನಾವರಣಗೊಳ್ಳುತ್ತವೆ. ಜೀವ-ಜೀವನದ ಎಂತೆಂತಹ ತತ್ವ-ಸತ್ವಗಳೊಂದಿಗೆ ಐಪಿಲ್ ಸಮೀಕರಣಗೊಳ್ಳುತ್ತದೆ. ಅಂತಹ ಸಂಗತಿಗಳ ಸುತ್ತ ಹೆಣೆದ ಹತ್ತು ಹನಿಗವಿತೆಗಳು. ಗುಪ್ತ-ಸುಪ್ತ ಭಾವ-ಭಾಷ್ಯಗಳ ಅಭಿವ್ಯಕ್ತಿಸುವ ಅಕ್ಷರಪ್ರಣತೆಗಳಿವು. ಒಪ್ಪಿಸಿಕೊಳ್ಳಿ..” - ಪ್ರೀತಿಯಿಂದ ಎ.ಎನ್.ರಮೇಶ್.ಮ.

ಐಪಿಎಲ್ ಸಾಕ್ಷೀಕರಿಸುತ್ತಿಹ ಸತ್ಯಗಳು..

     

           - ಸತ್ಯ ಒಂದು-

ಸೋಲು-ಗೆಲುವು ಯಾವ ಶೃಂಖಲೆಯು ನಿಶ್ಚಿತವಲ್ಲ

ಅಂಕಿ-ಹುದ್ದರಿ ಏನೊಂದು ದಾಖಲೆಯು ಶಾಶ್ವತವಲ್ಲ.!

ಪ್ರತಿದಿನವೂ.. ಪ್ರತಿಪಂದ್ಯವೂ ಅನೂಹ್ಯ ವಿಸ್ಮಯ 

ನಿತ್ಯ ನವತಾರೆಗಳ ಉದಯ ಬರೆದಿದೆ ಹೊಸಅಧ್ಯಾಯ.!

                ******

             - ಸತ್ಯ ಎರಡು-

ಆಟ ಆಡುವವರೆಗಷ್ಟೇ ಸಂಗಡಿಗರು-ಎದುರಾಳಿಗಳು

ಆಟ ಮುಗಿದ ಮೇಲೆ ಶತೃಗಳು-ಮಿತ್ರರು ಎಲ್ಲ ಒಂದೆ.!

ಅಂಕಣದಲ್ಲಿರುವವರೆಗಷ್ಟೇ ಜಿದ್ದು, ಹೋರಾಟ, ವೈರತ್ವ

ಹೊರಬಂದ ಮೇಲೆ ಬೆಸೆಯುವ ದೇಶ ಭಾಷೆ ಬಂಧುತ್ವ.!

                 ******

              - ಸತ್ಯ ಮೂರು-

ಬೆಂಗಳೂರಿನವನು ದೆಹಲಿಗಾಗಿ ಹೊಡೆದಾಡಬಲ್ಲ

ದೆಹಲಿಯವನು ಬೆಂಗಳೂರಿಗಾಗಿ ಬಡಿದಾಡಬಲ್ಲ

ಹಣದೆದುರು ಹುಟ್ಟೂರು ಬಿಟ್ಟೂರು ಒಂದೆ ಎಲ್ಲ

ಯಾರೂ ಬೇರೆಯವರಲ್ಲ.. ಯಾರೂ ನಮ್ಮವರಲ್ಲ!

                 ******

             - ಸತ್ಯ ನಾಲ್ಕು-

ಹೋದವರ್ಷ ಹೈದರಾಬಾದಿಗೆ ಅಬ್ಬರಿಸಿದವನು

ಹೆಚ್ಚು ದುಡ್ಡು ಸಿಕ್ಕೊಡನೆ ತಂಡ ಬದಲಾಯಿಸಿ..

ಈ ವರ್ಷ ಕೊಲ್ಕೊತ್ತಾಗೆ ಬೊಬ್ಬಿರಿಯುತಿಹನು

ಹಣ ಖರೀದಿಸಬಲ್ಲುದು ಪ್ರೀತಿ-ನಿಯ್ಯತ್ತು ಎಲ್ಲವನು.!

                 ******

             - ಸತ್ಯ ಐದು-

‘ಈಸಲ ಕಪ್ಪು ನಮ್ಮದೇ’ ಎಂದು ಹೇಳಿ ಹೇಳಿ..

ಮುಪ್ಪು ಆವರಿಸಿದರೂ ಕಪ್ಪು ನಮ್ಮದಾಗಲಿಲ್ಲ

ಅಪ್ಪಿ-ತಪ್ಪಿಯೂ ಕಪ್ಪಿನ ಮೇಲೆ ಕೈಯಿಡಲಾಗಿಲ್ಲ.!

                  ******

           - ಸತ್ಯ ಆರು-

ಐಪಿಲ್ ಎಂಬ ಸಮ್ಮೋಹನದ ಮಂತ್ರದಂಡ

ಬದಲಿಸಿದೆ ಆಯ್ಕೆ ಅರ್ಹತೆಗಳ ಮಾನದಂಡ

ರಾತ್ರೋರಾತ್ರಿ ಉದಯಿಸಿಹರು ನಿತ್ಯ ನವತಾರೆ

ಬಡವರ ಮಕ್ಕಳ ಉಡಿಗೂ ಹರಿದಿದೆ ಧನಧಾರೆ.!

              ******

     - ಸತ್ಯ ಏಳು-

ಐಪಿಲ್ ಬದಲಿಸಿದೆ ಆಟದ ಶೈಲಿ

ಆಗಿಹುದು ಅಕ್ಷರಶಃ ಹಣದ ಥೈಲಿ

ಪ್ರೇಕ್ಷರಿಗೆ ರಣರೋಚಕತೆ ಹೋಲಿ

ಧನಿಕರಿಗೆ ಮೋಜುಮಸ್ತಿ ಖಯಾಲಿ

ಬಿಸಿಸಿಐಗೆ ಇದು ಬಂಗಾರದ ಕೋಳಿ.!

          ******

         - ಸತ್ಯ ಎಂಟು-

ಸಚಿನ್ ಮಗ, ಶಾರುಖ್ ಅಳಿಯ ಯಾರಾದರೇನು?

ಪ್ರತಿಭೆಯಿದ್ದರಷ್ಟೇ ಸ್ಥಾನ. ಆಟವಿದ್ದರಷ್ಟೆ ಮನ್ನಣೆ

ಜಾತಿ, ರಾಜ್ಯ, ರಾಷ್ತ್ರ ಕೀರ್ತಿ, ವಶೀಲಿಗಿಲ್ಲ ಬೆಲೆ

ಗೆಲ್ಲಿಸುವ ಸಾಮರ್ಥ್ಯವಿದ್ದರಷ್ಟೆ ತಂಡದಲ್ಲಿ ನೆಲೆ.!

            ******

           - ಸತ್ಯ ಒಂಬತ್ತು-

ಐಪಿಎಲ್ ಬೆಳೆದಿದೆ ರಾಜ್ಯ ರಾಷ್ಟ್ರಗಳನೆಲ್ಲ ಮೀರಿ

ಐಪಿಎಲ್ ಬೆಸೆದಿದೆ ಜಾತಿ ಧರ್ಮಗಳನೆಲ್ಲ ತೂರಿ

ಐಪಿಎಲ್ ಬೆಳಗಿದೆ ಭಾವ ಭಾಷೆಗಳನೆಲ್ಲ ಏರಿ

ಐಪಿಎಲ್ ಮಾರಿಕೊಂಡಿದೆ ಉದ್ಯಮಿಗಳ ಸಿರಿಗೆ

ಮಂಡಿಯೂರಿ ಕುಳಿತಿದೆ ಬಂಡವಾಳಶಾಹಿಗಳೆದುರಿಗೆ.!

          - ಸತ್ಯ ಹತ್ತು-

ನೋಡುವವರಿಗಷ್ಟೇ ಕ್ರೀಡಾಸ್ಫೂರ್ತಿ ಮಮಕಾರ

ಆಡುವವರಿಗೆ ಆಡಿಸುವವರಿಗೆ ಕೇವಲ ವ್ಯವಹಾರ

ಆಟಗಾರನಿಗೆ ಜೇಬು ತುಂಬಿಕೊಳ್ಳುವ ಹಾಹಾಕಾರ

ಮಾಲೀಕನಿಗೆ ಲಾಭ ಮಾಡಿಕೊಳ್ಳುವ ಹುನ್ನಾರ.!